Ek Raat Purane School Me (Part -1)

Ek Raat Purane School Me (एक रात पुराने स्कूल में )....[PART - 1]

Yeh ek actual incident hai aur mai sirf ise #KahaniBhootKi par share kar raha hu. Yeh tab ki baat hai jab mai 19 saal ka tha. Meri social life kuch khaas nahi thi bas kabhi kabhar kisi friend ke sath ghumne firne chala jata tha ya hum log badminton vagera khelte the. Badminton khelne ke liye hum shaam ko ek school-ground me jaate the kyoki waha ke gatekeeper mere dost ke uncle the toh jab bhi chahe hum chutti hone ke baad khel sakte the.

Ek din Saturday evening ko hum 3 dost us school me khel rahe the aur 1-2 ghante baad uncle aye aur mere dost rajiv se bole ke ,“mujhe kahi kaam jana hai aaj toh kya tum apne kisi dost ke sath aaj raat yaha ruk kar pehredari me meri help kar sakte ho?.” (Rajiv ke uncle gatekeeper ke sath-sath us school ke night watchman bhi the)
Yeh sunkar pehle toh rajiv thoda hichkichaya aur taal-matol kiya par baad me mere kehne par maan gaya (aur maine usey isiliye rukne ko kaha kyoki humne is school ke baare me kayi kisse-kahaniya suni thi).

Uncle ke jaane se pehle hum apne ghar ja kar gharwalo ko bol kar aye (ke aaj raat dost ke ghar ruk rahe hai) aur jarurat ki cheeje le aye jaise torch light , chaddar aur ek kettle me chaye (tea) aur kuch khana vagera. Uske baad uncle ne jaate samay hume sabhi kaam bata diye jaise school ke sabhi classrooms, library aur store rooms ko check karke lock karna aur raat hone par school ke bade gate ko under se lock karna aur jo lights zaruri ho sirf wahi jalana.

Unke jaane ke baad humne sabse pehle toh pure school ka ek chakkar lagaya aur sab classrooms dekhne lage. Classrooms khali the aur school me sirf hum teen dost, toh hum ek dusre par chalks se attack karne lage, fir desks par likha padhne lage, kisi desk par kuch sheyaro- shayari likhi thi toh kisi par kuch cartoons aur hearts bane the. Woh school kafi purana tha aur uska kuch hissa hi naya bana tha toh us school piche ki taraf purane girls washrooms ( jo kisi karan ab istemaal nahi kiye jaate the) aur purane peepal aur bargad ke ped the.

Gramiyo ke din the aur us din andhera jaldi ho gya toh hum log jaldi-jaldi rooms lock karne lage. Hum logo ne sectons baant liye the ta ke kaam jaldi ho jaye ab hum teeno akele-akele ho kar classrooms me jakar khidkiya aur darwaze band karne lage.
Andhera , sunsaan school aur iske sath jude kuch kisse , jinke kaaran under se mai thoda dar bhi raha tha par exited bhi tha kyoki abhi tak toh kabhi kuch paranormal mehsoos nahi kiya tha maine sirf T.V me hi aisa kuch dekha tha.

Doosri manzil ke kuch classrooms me se kabhi-kabhar koi awaz aa rahi thi jaise kisi cheej ke khiskne ki ya lohe ke ghisarne ki aur yeh sunke achanak mai kuch samay ke liye sunn pad jata tha , fir jaldi se kaanpte hatho se darwaza band karke aage bhaag jata tha.

Akhirkar humne sare classrooms aur storerooms ko lock kar diya aur tab tak raat ke 8;30 baj chuke the. Ab hum uncle ke room me chale gaye jo ground ke piche ki taraf tha aur iss room ke left side me who purane ped the aur thoda aage wohi purane girl’s wasrooms the (थे).

Uncle ka woh temporary kamra kafi chota sa tha under ek purana bed, ek sandook , ek radio aur kuch kapde the. Andar peeli roshni wala ek bulb aur ek purana pankha tha aur diwaro par bhagwan ki taswire chipayi hui thi. Humne sabse pehle toh ghar se laya huya khana khaya. Khana khane ke baad hum chaye peene lage aur baate karne lage kyoki yaha aur kuch karne ko tha nahi. So humare dusre dost (deepak) ne baato-baato me bataya ke store room ka darwaza band karte samay usey veham hua tha ke koi store room ke darwaze ke peeche tha lekin fir usne dubara dekha light on karke toh waha koi nahi tha. Yeh baat toh usne yu hi bata di thi lekin jo mujhe sunai diya maine woh kisi ko nahi bataya kyoki us samay mai mahaul ko gambhir aur darawna nahi banana chahta tha. 

Par fir rajiv ne woh baat shuru kar hi di jise mai avoid kar raha tha. Usne deepak ko woh baat batani shuru kar di jo usne apne pita se suni thi iss school ke baare me.
“ pehle pehal yeh sirf ladkiyo ka school huya karta tha, aas paas ke gaon se bhi yaha ladkiya padhne aati thi. Kehte hain ke ek baar barahvi (12) class ki ladki ne kisi bhut badi baat ke chalte bahar lage bargad ke ped par apni chunni se latak kar faasi laga li aur yeh kaam usne chutti hone ke baad kiya tha ta ke usey koi waha rokne na aye aur kisi ko agle din tak is ghatna ka pata nahi chala jab tak ke usi ki ek saheli ne us ladki ki laash latkati hui nahi dekhi.” 

Rajiv ki yeh baat sunte huye meri ankhon ke sahmne yeh sab ek sachi ghatna ki tarah chal raha tha. Ab mujhe kuch abhaas sa ho raha tha. Us kamre me ek choti si khidki thi jis se bahar andhere me ek ped dikhayi de raha tha. Ab chaye khatam ho chuki thi par baate toh abhi shuru hi huyi thi.

END OF PART 1


a story by - Vikraant Mokash

Tags - #hauntedschoolstory #realhorrorstory#hindihorrorstories #IndianGhostStories