Ehsaas ( एहसास ) ( based on a true story )

Toh baat shuru hoti hai ek shaam se jab mai apne kaam se vapis ghar aya. Actually mai ek software company me job karta tha aur kai baar ghar aate-aate mujhe der ho jaati thi. Ghar me mujhe mila kar kul (total) 4 log the. Flat bada tha toh harek ka apna-apna room tha.

Ek raat jab mai kaam se lauta toh kaafi andhera ho chuka tha aur thakaan hone ke kaaran mai khana kha ke bas bistar par let gaya aur mujhe pata hi nahi chala ke kab neend aa gayi.

Dheemi si roshni ke saath meri aankh thodi si khuli. Woh roshni kaafi thodi si thi aur deewar ke uper lage mirror se reflect ho rahi thi. Mai ulta leta hua tha aur mera face darwaze se ulat doosri disha me tha. Mujhe yaad tha ke maine darwaza lock kiya tha par kab kiya tha yeh yaad nahi tha. Ab mai bilkul bhi hil nahi paa raha tha, lag raha tha jaise poori tarah se paralyze ho chuka hoon. Sirf meri ankhen hil paa rahi thi par mere saamne ek deewar thi bas. Roshni kuch pal ke liye hi thi bas, ab andhera tha kamre me AUR kisi ke mere kamre me hone ka ehsaas ho raha tha mujhe.

Koi awaz nahi aa rahi thi, bilkul sannata tha. Mai ankhe band nahi kar sakta tha kyoki tab mujhe mera dimaag bhut darawane chehre dikhata. Ek ajeeb si ghabrahat ho rahi thi aur saath hi dil zor se dhadak raha tha. Mai bhut dheere-dheere saans le raha tha taki kamre me hone wali koi bhi choti se choti halchal mujhe sunai de par fir bhi kamre me mujhe sirf meri hi saans ki awaz sunai de rahi thi. Neend ab puri tarah se ud chuki thi aur dimaag me bhut kuch chal raha tha. Tabhi mere dil ne teji se dhadakna shuru kar diya kyoki abhi-abhi esa mehsoos hua tha jaise koi bed par dheere se baith raha ho. Mera sareer paseena aane ke baad thanda pad raha tha. Ab mai apne sareer me kaid sa tha kyoki mai chillaana chahta tha, tezi se uth kar bhaagna chahta tha ya kam se kam bed se neche utarna chahta tha par jaise sabhi ang bhut bhaari ho gaye the.

" Saans ki awaz thodi aur gehri ho gayi thi kyoki abhi kamre me sirf mai hi saans nahi le raha tha. "
..
..
..

Deewar par laga clock tedha hone laga aur tabhi mere seene me bhaari dard hua

AUR...
...
...

mere mooh se ek zordaar cheekh nikli. Ab mai zor-zor se chilla raha tha aur har chillahat ke sath mai halka mehsoos kar raha tha. Mai 4-5 baar chillaya aur tabhi mere Flat-mates darwaza khatkhatane lage aur mujhe awaze dene lage. Maine uth kar darwaza khola aur unke puchne par deewar par ulte huye clock ko dekhte huye bataya ke " kuch nahi bas ek bura sapna tha."

( Based on a true experience )

Written by - Simar S.