Ek Raat Purane School Me ( Final Part)

( Final part ) ...

Khidki se chaand ki roshni me woh bargad ka ped dikhayi de raha tha jo abhi darawana lag raha tha. Mujhe na jaane kyo rajiv ki baat sunne ke baad kuch darr sa lagne laga tha. Fir esa bhi dikhayi diya (ya bhramm hua) jaise bargad ki ek shaakha se kisi ki patli si baaju neeche ki taraf latak rahi thi.

Chaye peene ke baad hum kuch der ke liye let gaye aur kuch idhar-udhar ki baate karne lage. Fir kamre me baaton ki awaz dheemi hoti gayi aur pta nahi chla ke teeno kab so gaye.

Kuch ghisarne ki awaz aa rahi thi, theek kamre ke bahar se, khidki wali taraf se awaz dheere-dheere darwaze ki taraf aati mehsoos hui. Maine apni saans rok rakhi thi ke shayad mujhe jaga hua dekh WOH andar na aa jaye. Isi darr se hi maine rajiv ya deepak ko bhi awaz nahi di jo mujhse thodi hi doori par lete huye the.

Dil ki dhadkan ab kaano me mehsoos ho rahi thi par fir bahar se aati woh awaz band ho gayi. Ab yeh sannata us awaz se bhi kahi zyada darawana lag raha tha. Koi awaz nahi aa rahi thi, maine dheere se hilne ki koshish ki par himmat na ho paayi hilne ki. Mujhe mehsoos hua ke mere ek pair (foot) par chaddar nahi thi jabki mere sare badan par chaddar thi. Woh ek pair hi sirf bahar tha aur lag raha tha ke abhi koi mujhe usi pair se pakad kar neeche ki taraf kheench lega.

Khidki ke bahar bargad ke pass se kuch awaz fir se shuru hui ...

Kuch ajeeb si thi yeh awaz, kuch samajh nahi aa raha tha ke bahar kya cheez hai aur jo bhi hai woh kya kar raha hai.

Ab thodi si himmat hui dekhne ki, socha agar marna hi hai toh yeh jaan ke marunga ke woh kya cheez hai. Main dheere se utha aur maine rajiv aur deepak ki taraf dekha par unhe jagaya nahi. Mai halki si bhi awaz karke us cheez ka dhyaan apni taraf nahi kheechna chahta tha. Bhut hi ahistaa se main khidki ke paas gaya aur halke se khidki par naak tikakar bahar dekhne laga.

Bahar ka nazara dekh kar mera dil dhakk reh gaya, aisa laga jaise mere sar ko dono taraf se kisi ne achanak jakad kar chod diya ho.
" ek ladki jisne ek khula safed, pairo tak lamba kurta pehna tha, jiski skin uske kurte se bhi jyada safed thi aur lambe kaale baal the , woh apne sareer ko ek makdi ki tarah faila kar dheere-dheere us bargad ke ped par chad rahi thi. Yeh manzar bhut hi bhyanak tha. Woh ek moti shaakh (branch) par chad gayi aur fir apne sar ke peeche se ek kaali chunni nikaalne lagi. Yeh chunni bhut lambi thi, fir usne iss chunni ke ek sire par ek fanda banaya us chunni ko us shaakh se baandh diya aur neeche kood gayi. Ab us bade bargad ke ped par ek kaala fanda latak raha tha aur uske theek neeche khadi thi woh khaufnaak aatma.

Fanda agey-peeche jhool raha tha toh us ladki ne usse apne lambe safed haath se pakad liya aur ekdum meri taraf dekhne lagi. Mai cheekh pada par jaldi hi mujhe ehsaas ho gya ke cheekhna ek jaanleva galti thi. Woh dheere dheere meri taraf badh rahi thi, wahi ghisarne ki bhyanak awaz, woh chal nahi rahi thi bas kisi tarah zameen par tair kar meri taraf badh rahi thi.

Mujhe ek khaufnaak ehsaas hua ke ab mai khidki ke peeche nahi tha balki na jane kaise kamre ke bahar khada tha aur khidki wali deewar mere peeche thi. Ab chupne ki koi jagah nahi thi,  meri saans phool rahi thi,  seene me dard ho raha tha, lag raha tha jaise mai bhut halka ho gaya hu.

Aur......

Woh bhyanak chehra mere saamne tha,  ek esa chehra jis par aankhe ya naak nahi the. Sirf ek mooh tha jo achanak se khula aur uske andar se dil dehlaane wali ek awaz nikli aur usne apni lambi paini (sharp) ungaliyan meri gardan me ghusa di aur....

Maine apni gardan par dheere se haath lagaya aur jaise pehli baar choone se yakin nahi huya ke gardan par kuch nahi tha. Maine apni ankhe kholi aur dekha ke khidki wahi par thi aur mai kamre ke andar hi tha.
Rajiv aur deepak abhi bhi so rahe the par ab andhera kuch kam ho chuka tha. Maine unhe uthaya par raat ki ghatna ke baare me kuch nahi bataya kyoki mujhe bhi nahi pta tha ke yeh sab hakikat thi ya bas ek bura khwaab tha. Maine sehme huye dil se bargad ke ped ki taraf dekhya aur ek pal ke liye mujhe waha ek kaali chunni latakti dikhayi di.

( based on the true experience of vikraant mokash)

Written by - Simar S.