Kya ise padhne ke baad bhi aap yahi kahenge ke Bhoot nahi hotey? (Famous Urban Legends)

Horrifying Urban legends

Ajj baat karte hai duniya ke kuch darawane bhootia kisson ke baare me, jinme se kuch ko bilkul sach maana jaata hai aur daava kiya jaata hai ke unka hona ek sachai hai. Inhe Legends bhi kaha jata hai kyoki yeh kisse  kayi sadiyon se chale aa rahe hain. Yeh kisse dunia ke kuch alag-alag hisson me prachalit (famous) hain.

Sabse pehle naam aata hai ek ese jeev ka jiske baare mai kayi log alag-alag andaza lagate hai ke woh ek pret hai, kuch kehte hain ke woh ek aatma hai aur kuch kehte hai woh ek chudail hai.

Bloody Mary naam ki yeh dushat (evil) aatma tab prakat (appear) hoti hai jab ise bulaya jaata hai.
Kayi communities me mana jata hai ke bloody mary ko pehle apna future janne ke liye sheeshe (Mirror) me bulaya jaata tha par sirf kuch log hi uske baare me batane ke liye zinda bache kyonki yeh chudail ise bulane wale insaan ki ankhe noch leti hai, uska gala dabane lagti hai ya fir uske sareer se khoon peene lagti hai.

Bloody Mary ki bulane ki prakirya (procedure) ke liye ghar ki sabhi lights bujhai jaati hai fir bathroom me jaakar sheeshe ke aage 3 choti mombatiya (candles) jalayi jaati hai aur 13 baar (ya kayi countries me 3 baar) Bloody Mary ka naam liya jaata hai, par,  naam lete samay sheeshe me ghoorna zaruri hota hai. Akhri baar naam lete hi ek bhayanak aurat (Bloody Mary) ka chehra sheeshe me dikhayi deta hai aur woh usko bulane wale ki ankhen nochne lagti hai.

Japan me Hanako-san naam ki ek aatma ka zikar hai jo Bloody mary ki tarah hi sheeshe me dikhti hai par yeh aatma ek choti ladki ki hai jo school bathroom me dikhti hai jab uska naam chillaya jaata hai. Kayio ka kehna hai ke yeh aatma ek khoon se sane haath ke roop me iska naam chillane wale insaan ko bathroom me kheech leti hai aur zinda khaane lagti hai.

Teke-teke ek aur japanese legend hai jo darasal ek ladki thi jo ek raat train ki patriyo par gir gayi aur train uske uper se guzar gayi jis vajah se uska adha sareer kat gya. Tab se woh ek pret ban gayi aur apni kohniyo ke sahare rengne lagi. Maana jata hai ke kayi train stations par adhi raat ko teke-teke ka pret rengta huya logo ki taraf daudta hai aur logo se poochta hai, " Kya apne meri taange dekhi hai? ".

Teke-teke ke sath ek aur kahani judi hai, kehte hai ke ek baar ek ladka raat ko apne ghar jaa raha tha aur raaste me ek bhut khoobsurat ladki ek ghar me khidki se raaste ko dekh rahi thi. Ladke ne uski taraf dekha aur smile kiya. Ladki ne bhi smile kiya. Ladka usse baat karne ke liye wahi par ruk gaya par isse pehle ke woh kuch pooch pata,  ladki khidke se kood gayi aur uska adha kata hua sareer saamne aa gya. Ladka darr se sehem gya aur isse pehle woh bhaag pata uss pret ne usey adha kaat diya aur agle din us ladke ki sirf adhi laash hi waha padi hui mili.


By - Simar s.